jean marot

• Jean MAROT (1463-1526)
  

A tout jamais, d'un amour immuable



A tout jamais, d'un amour immuable,
La veuil servir, comme la plus notable
Qui soit vivant, et du plus beau maintien.
La raison est : car son coeur et le mien
Ne sont plus qu'un par un vouloir semblable.

Elle, voyant mon mal estre importable,
M'a dit ce mot qui tant m'est agréable :
"Mon coeur avez ; et le vostre retien
A tout jamais."

Serois je doncques bien miserable
D'estre vers luy traistre ni variable,
Considéré le plaisant entretien
Qu'elle m'a faict ? Je servirai si bien
Que de ma part l'amour sera durable
A tout jamais.

• Jean MAROT (1463-1526)
  

Coeur endurci plus que la roche bise



Coeur endurci plus que la roche bise,
Vent aspirant pire que nord ou bise,
De grief refus tant orgueilleulx et fier,
N'est il moyen de te mollifier
Par tel façon que grace en fust acquise ?

O que les Dieulx ont mal ta place quise
De te loger en maison si exquise,
Pour en vertus tant te glorifier,
Coeur endurci !

Considéré que, sans coup de main mise,
Je fus navré d'une oeillade transmise
De ton logis, qui me vint défier,
Il te plaira mon mal pacifier
En me donnant grace que j'ay requise,
Coeur endurci.

• Jean MAROT (1463-1526)
  

D'avoir esgard à l'Honneur



Devant voz yeulx Dames ayez Honneur
Et si voullez parvenir à bonheur
Ne faictez riens que ne voullez qu'on saiche,
Car il n'est feu quelque part qu'on le cache
Dont il ne sorte ou fumée ou challeur.

Craignez ung Dieu, honnorez ung seigneur,
Faictes la sourde à tout grant blasonneur
Et ne souffrez jamais faire ung tour lasche
Devant voz yeulx.

Donnez où fault et fuyez le donneur,
Car le donnant oblige le preneur
Et gardez bien que la vilaine tache
D'ingratitude en vos cueurs ne s'atache,
Car il n'en peult venir que deshonneur
Devant vos yeulx.

• Jean MAROT (1463-1526)
  

D'eviter oisiveté



Plus que poison fuyez le dur meschef
D'Oisiveté, car c'est la porte et clef
De tous pechez, sans en excepter ung.
Ainsi le dit feu Maistre Jehan de Meung
En son vivant des poetes le chef.

Dames portans atour ou couvrechief,
Si vous voulez d'honneur venir à chef,
Dechassez-la, car ce vous est aigrun
Plus que poison.

Comme les vens singlans en voille et tref
Font nauffraiger souvent la pouvre nef,
Oisiveté a vent tant importun
Que, s'elle attainct les membres de quelqun,
Percluz les rend par ung coup rudde et grief
Plus que poison.

• Jean MAROT (1463-1526)
  

De bien faire durant la vie



Après la Mort n'est seurté de querir
Remedde aucun pour l'ame secourir :
Dont faire fault telles ceuvres tousjours
Que l'on vouldroit faire les propres jours
Que dure Mort nous vient prandre et saisir.

Dames d'honneur tastez donc conquerir
Toutes vertus, tant qu'ilz facent florir
Voz beaulx espritz aux celestines cours
Apres la Mort.

Que veult-on plus en ce monde acquerir
Que bon renom, bien vivre et bien mourir ?
Puys qu'à la fin de ce mortel decours
Tous humains n'ont qu'à Jesuchrist recours
Pour les garder de tout mal encourir
Apres la Mort.

• Jean MAROT (1463-1526)
  

De constance



Sans varier moins que le polle articque
Doit la Dame estre et de cueur pacifique,
Porter en paix les grans hurtz de Fortune ;
Se bien luy vient ou malheur l'importune
N'en soit joyeuse ou plus melencolicque.

Contre bonheur constance à soy applicque,
Puys de force ayt la vertu magnificque
Pour tollerer toute griefve infortune.
Sans varier.

Le polle est fixe et le ciel erraticque ;
Semblablement tout trezor terrificque
Va et puys vient, ainsi que faict la lune,
Mais cueur constant n'en a joye ou rancune
Se monstrant polle envers Fortune inicque
Sans varier.