غادة يا الأيام

غادة يا الأيام
هزيت عيني لمرايا و دمعتي هوادة
على خدي،واد غابت عنو السعادة
ورا الجفان،اللي غادة
بكاها م يسمعو غير اللي ذاق العذاب
وهو غريب حتى وسط الأحباب
فصدرو أنين و بين الجناب
لا من يحس بجرحه ونبضه
لا من يفهم علاش القدر ضده
الخلان والصحاب تنفضو
زادو السعد المغدور
و ليلو بالسهد ممهور
و الأيام اللي كتدور
ف حلقة غارقة و مسدودة
للسلك الراشي مشدودة
ف الفلك المجهول مرصودة
شمسه خدات الضباب وسادة
ما يديها نعاس،يا سادة
أيامه بالمهل غادة
راكبة فكرون صام طول الأيام
رافض لنشاد و البسمة و حتى الكلام
إلى داز على الفرح ما يرد له سلام
هزيت عيني لسما
شمسها غادة طيح في آلما
ليلها زحاف و عمى
بلا عكاز، ماشي يتهادى
لا فجر بان و لا ادنات شهادة
لا كمرة لا نجوم لا سهرة مكادة
واه يا الأيام اللي غاده
ضفايري بالأزرق شابو
مفاصلي بداو يتصابوا
بالعيا،من الجري بلا فايده
من الوقت اللي غلات و زايده
من الخليصة نازلة ف تهويده
غادة غادة الوقت
تجري،عرقان ه تلهث
ساقها الريح و ما تتلفت
أه يا الأيام تجري و تجاري
كون تجي توالي يا ناري
نولي بايع ف السعد و شاري
نخلق سوق و بورصة
نتتبع السهم و نأكل ب المناص
حتى نموت ش نهار بال فقصة
أه يا الأيام،؟كيف ما ندير
ما نصيب نوقف ولا نسير
حساباتي كلها تقدير
غاده غاده يا الأيام
مهما نتامل و نزيد ف التخمام
مهما نسهر الليل و لا نام
ل مزيوده ما تعمر ما تخوى
راس مالي هضره،لا هي ترياق و لا دوا
لا هي حجاب و لا جلبة ضد الهوى
كلامي ما يجرح ما يداوي
يعطر و يبخر كيف الجاوي
صريح واضح ما فيه تلاوي
و أنا،غاده غاده،؟طريقي مسطر
بقلم احمر
خطته يد القدر
ما يصيبني غير اللي كتب مولانا
هو خلقنا هو يرعانا هو ألعلي اللي فيه رجانا
*=*=*=*=*=*=*
غادة غادة يا الأيام الشاعرة: عزيزة رحموني